कार्तीक २२, रामेछाप
व्यवस्थित आवासको व्यवस्था नहुँदा चिसो बढेसँगै रामेछापको माथिल्लो भेगका भूकम्प प्रभावितहरु थप मारमा परेका छन् ।
चिसो बढे पनि चिसो छल्ने घर नहुँदा भूकम्प प्रभावितहरु थप समस्यामा परेका हुन् । जिल्लाका गुम्देल, बाम्ति, चुचुरे, ठोसे, प्रिति, कुभुकास्थली, गुप्तेश्वर, रस्नालु, बेताली, नामाडी, फर्पूृ, गौश्वारा, डडुवा, टोकरपुर, दोरम्बा, खाँडादेवी, हिलेदेवी, दिमीपोखरी लगायतका गाविसमा कात्तिक महिना लागेसँगै चिसो बढेको छ । चिसो बढेपनि भूकम्प प्रभावितहरु अहिले पनि अस्थायी टहरामा नै वस्दै आएका छन् ।
उनीहरुलाई हिउँदको चिसो काट्न यस वर्षपनि संकट पर्ने भएको छ । सरकारले स्थायी आवास निर्माणको लागि उपलब्ध गराउने भनेको नगद सहयोग समयमा नै उपलब्ध गराउन नसक्दा भूकम्प पीडितहरुले स्थायी आवास बनाउन नसकेका हुन् । सरकारले दिने भनेको ३ लाख रुपैयाँ मध्यको पहिलो किस्ता ५० हजार भर्खर मात्र भूकम्प पीडितले लिएका छन् । घर बनाउने सामान र नगदको जोरजाम गर्न नपाउँदै चिसो पसिसकेको छ । जस्ताको छानाका टहराहरुमा चिसोका कारण छानोबाट सित चुहिन लागेको भुकम्प पिडितहरुले बताएका छन । जस्ता बाट पानी परे जसरी शित चुहिन लागेपछि मानिसहरु बिरामी पर्न थालेका छन । कतिपय मानिसहरुमा चिसोको कारण टाउको दुख्ने, ज्वरो आउने लगायतयको समस्या देखिएको छ । भूकम्पको कारण घर भत्किए पछि जिल्लाका अधिकांश मानिसहरुले अस्थायी टहरो बनाएर बसेका छन् । टहरामा सुत्दा विहान उठ्ने बेलामा ओढेको लुगा सितले भिज्ने पीडितहरुको भनाई छ । चिसोको सबैभन्दा बढी असर बालबालिका ,जेष्ठ, अशक्त र विरामीहरुमा देखिएको छ ।
उनीहरुमा निमोनिया, दम, खोकी ज्वरो लगाएतका रोगहरु देखिन लागेका छन् । सरकारले पहिलो किस्ता रकम उपलब्ध गराए पनि प्राविधिकको प्रत्यक्ष निगरानीमा तोकिएको मापदण्ड अनुसार घर बनाउनु पर्ने भएकाले घर निर्माणमा अझ ढिलाई हुने देखिएको छ ।
