नेपाल सम्वत् ११३७ को अवसरमा आज बिहान नेवा खल रामेछापले मोटरसाइकल र्याली निकालेको छ । यस संम्वतलाई हाल नेवार समुदायले नयाँ वर्षका रुपमा मनाउने गरेका छन् । राष्ट्रिय विभूति शंखधर साख्वाले विसं ९३७ (इ सं ८८०) मा गरिब जनताको ऋण मोचन गरी नेपाल संम्वतको शुरुवात् गराउनु भएको थियो ।
नेपाल संम्बतले पृथ्वीनारायण शाहको शासनकालसम्म राष्ट्रिय संम्बतको मान्यता पाएको थियो । लिच्छविकालका राजा राघवदेवको शासनकालबाट सुरु भएको नेपाल संम्बत पृथ्वीनारायण शाहको शासनकालसम्म मौलिक संम्वतको रुपमा चलेको थियो । लिच्छविकाल अघि यस सम्वतलाई शक संम्वत रुपमा मनाउने प्रचलनमा थियो ।
विसं २००७ सालमा प्रजातन्त्रको स्थापना भएपछि नेपाल सम्वतलाई राष्ट्रिय मान्यताका लागि अभियान चलाइएको थियो । नेपाल सम्बतको नयाँ वर्ष काठमाडौँ, ललितपुर, भक्तपुर, बनेपा, धुलिखेल, बाह्रबिसे, दोलखा, रामेछाप लगायतका नेवार समुदायको बाहुल्यता रहेका स्थानमा बिशेषरुपमा मनाउने गरिन्छ ।
गरिब जनताको ऋण मोचन गराई सामाजिक सेवाको उत्कृष्ट नमूना प्रस्तुत गरेको र नेपालमा मौलिक संम्वत समेत चलाएको कार्यको उच्च मूल्याङ्कन गर्दै विसं २०५६ सालमा नेपाल सम्वतको नयाँ वर्षका दिनमा तत्कालीन प्रधानमन्त्री कृष्णप्रसाद भट्टराईले साख्वालाई राष्ट्रिय विभूति घोषणा गर्नभएको थियो ।
त्यस्तै विसं २०६५ मा तत्कालीन प्रधानमन्त्री पुष्पकमल दाहाल प्रचण्डले नेपाल संम्वतले राष्ट्रिय मान्यता पाउने घोषणा गर्नुभएको थियो । काठमाडौंमा कार्तिक कृष्ण औँसीका दिन बहीखाता बन्द गरी नयाँ वर्ष अर्थात् कार्तिक शुक्ल प्रतिपदाका दिन नयाँ बही खाताको सुरुवात् गर्ने परम्परा समेत छ ।
