वैशाख ८,रामेछाप-रामेछापको सदरमुकाम मन्थलीमा मंगलबार साँझ बसले मोटरसाइकललाई ठक्कर दिंदा मृत्यु भएको भिमबहादुर थापा र घाइतेको आफन्तहरुले सडकमा प्रदर्शन गर्दा मन्थली–काठमडौं तथा जिल्लाको सवारी आवागमन ठप्प भएको छ । मृतक र घाइतेका आफन्तले मृतकका परिवारलाई क्षतिपूर्ति र घाइतेको उचित औषधोपचारको माग गर्दै प्रदर्शन गरेपछि बिहानैदेखि यहाँको जनजीवन प्रभावित भएको छ ।
मृतकका आफन्तहरुले यातायातका साधन मन्थली बजार प्रवेश गर्ने नाका मन्थलीको भैसेश्वर र मदनभण्डारी चोकमा मृतक र घाइतेका आफन्त साथै मन्थलीका स्थानीय बासिन्दाहरु भेला भई अवरोध गरिरहेका छन् । बिहान ७ बजेदेखि सडक बन्द गराएपछि मन्थलीबाट काठमाडौं जाने गाडीहरु मन्थलीमै रोकिएर बसेका छन् ।
विवाहको जन्ती बोकेर आएको विपी यातायातको ना ४ ख ना.४ख ९००५ नं.को बसले मन्थलीको भैसेश्वरबाट मन्थली बजारतर्र्फ आउँदै गरेको बा ३४ प ७६५४ नम्बरको मोटरसाइकलाई ठक्कर दिंदा वाइकको पछाडी सवार रहेको रामेछाप गेलु–२ निवासी भिमबहादुर थापाको मृत्यु भएको थियो भने वाइल चालक नारायणहरी सुदेवी गम्भीर घाइते भएका थिए ।
रामेछापबाट काठमाडौंको लागि साना ठूला गरि दैनिक एकसय भन्दा बढी यात्रुबाहक सवारी सधानहरु छुट्ने गरेका थिए । सडक अवरोधका कारण सबै सवारी यातायातहरु मन्थलीमै रोकिएर बसेका छन् ।
मृतकको उचित क्षतिपूर्ति र घाइतेको उपचारको व्यवस्था भएसम्म सवारी यातायात सञ्चालन हुन नदिने प्रदर्शनकारीले बताएका छन् ।
