अन्तिम समयमा आएर कार्यविधि पास हुन नसकेको, जिल्लामा रकम निकासाका लागि कानुनी अड्चन रहेको र केन्द्रिय कार्यान्वयन इकाई गठन सम्बन्धी मन्त्री परिषदबाट निर्णय हुन बाँकी रहेकाले अनुदान वितरणको काम स्थगित भएको राष्ट्रिय पुनर्निर्माण प्राधिकरणका उप सचिव भीष्म भुसालले जानकारी दिनुभयो ।
उहाँका अनुसार केही मन्त्रालयले गर्नुपर्ने काम पनि बाँकी छ भने रकम खर्च गर्ने अख्तियारी, सेवाग्राहीको अभिलेख र आवास निर्माण सम्बन्धी द्धिपक्षीय सम्झौता लगायत प्रक्रियागत कामहरुका बारेमा अष्पष्टता भएकाले पनि पूर्व घोषित कार्यक्रम स्थगित गर्नुपरेको हो । राष्ट्रिय पुनर्निर्माण प्राधिकरणले बिहीबारदेखि दोलखाको सिंगटीबाट पहिलो किस्ताको अनुदान रकम वितरण गर्ने जनाएको थियो ।
सरकारले पुनर्निर्माणका लागि अनुदान रकम नदिएका कारण भूकम्प गएको १० महिना वितिसक्दा पनि पीडितहरुले घर बनाउन सकेका छैनन् । नयाँ घर बनाउन नपाएका कारण सबैजसो भूकम्प पीडित अहिले पनि अस्थायी छाप्रामा बसिरहेका छन् ।
