काठमाडौं, फागुन २० – नेपाली कांग्रेसकी नेतृ सुजाता कोइरालाले सभापतिमा रामचन्द्र पौडेललाई समर्थन गर्ने हुनुभएको छ । सभापतिमा आफ्नो उम्मेदवारी फिर्ता गर्दै उहाँले पौडेललाई समर्थन गर्न लाग्नुभएको हो ।
बुधबार छुट्टाछुट्टै पत्रकार सम्मेलन गरी उम्मेदवारी घोषणा गरे लगत्तै पौडेल र सुजाताबिच सहमति भएको हो । कांग्रेस नेतृत्वको सरकार बनेको अवस्थामा सुजातालाई प्रधानमन्त्री बनाउने पौडेलले आश्वासन दिनुभएको छ । यस्तै पौडेलले विधान संशोधन गरेर सुजातालाई महिला उपसभापति बनाउने पनि आश्वासन दिनुभएको छ ।
यसअघि वरिष्ठ नेता शेरबहादुर देउवा पक्षको असहमतिका कारण विधान संशोधन प्रस्ताव दर्ता नभएपनि महाधिवेशनपछि आफू सभापति भएमा महासमिति बैठक बोलाएर संशोधन गर्ने पौडेलको भनाई छ । यस्तै कार्यसमितिमा मनोनित हुने २१ जनामध्ये ५ जना सुजाताले भनेको मान्छे राख्न पनि पौडेल सहमत हुनुभएको छ ।
